اللوح الشمسي


هنتكلم النهارده عن اللوح الشمسي
زى ما عرفنا المقال اللى فات ان الجهد اللى بنقدر ناخده من الخليه الشمسية بيكون فى حدود 0.5 فولت فى حالة توافر ظروف معينه وان الجهد ده جهد مستمر DC
وان مهما كان مساحه مقطع الخليه دى الجهد بيظل 0.5 فولت كل اللي بيتغير هو قيمه التيار
طيب ازاى بنقدر نشغل عليه احمال ؟
عشان نقدر نشغل احمال لازم نعلي الجهد ده ليصل ل 12 فولت او 24 فولت
طريقه زياده الفولت بتنتج من اننا نوصل مجموعه خلايا معا بالتوالى يعنى الطرف الموجب لخليه مع الطرف السالب لخليه اخرى وهكذا لحد ما نصل بالفولت بقيمه اللى محتاجينها
ومنها يبقا حصلنا على مجموعه خلايا متصلة معا بتنتج جهد مستمر بالقيم المطلوبه
بعد ما بيتم توصيل الخلايا معا بيتم تغليفهم بطبقه تسمى ايفا وكمان بيتم وضع دعامة خلفيه تسمى بالداعم الخلفى back sheet وكمان طبقة زجاج لحماية الخلايا وتجميع كل الطبقات دى باطار من الألومنيوم وبكدا بيكون جمعنا لوح شمسي solar module
وعشان نقدر نوصل اللوح داخل المنظومة بيتم تجميع أطراف الخلايا اللى جمعناها معا توالى وبنجمعهم داخل ما يسمى بصندوق التجميع junction box ده عبارة عن صندوق اسود مثبت فى ظهر اللوح الشمسي وبيكون بداخله عدد من الدايودات المسئوله عن حل مشكلة بتواجه الالواح الشمسية وهى مشكله التظليل shading

يبقا اى لوح شمسي بيكون من
1- مجموعة من الخلايا المتصله معا بالتوالى
2- داعم خلفي back sheet
3-ماده تغليف Eva
4-شيت من الزجاج
5- اطار الومنيوم
6- صندوق تجميع junction box
اى لوح شمسي بيتم توصيل الكابلات بتاعته باطراف توصيل تسمى MC4 connectors
اى لوح شمسي بيتحدد نوعه ع اساس نوع الخلايا المستخدمة جواه يعنى لو الخلايا من النوع البولى كريستال بنقول ان ده لوح بولى كريستال poly crystal ولو الخلايا مونو كريستال يبقا بردوا اللوح الشمسي هيكون مونو كريستال mono crystal

اى لوح شمسي بيتم تحديده ع اساس عده عوامل
1- نوعه زى ما وضحنا
2- القدرة الإنتاجية بتاعته يعنى بنقول لوح شمسي كام وات .. الالواح الشمسية بتتراوح قدرتها الإنتاجية من اول 50 وات او اقل نسبيا ، و 70وات 100وات ودول بيستخدموا فى منظومات معينه زى اعمده الانارة واللافتات الاعلانية
وبالنسبه للقدرات اللي بتستخدم فى المشاريع ذات الإنتاجية الكبيرة بتكون 150 وات ، 265وات 270وات واحيانا بيتواجد الواح اعلى من ال 300 وات
3- من العوامل اللي لازم نشوفها عند شراء اللوح الشمسى هى الكفاءه بتاعته
وكذلك ما يسمى بجهد الفتح voc وتيار ال short circuit
هنكلم عن الخصائص الكهربيه لاى لوح شمسي في مقال منفصل وازاى بعض المعاملات فى الداتا شيت الخاصه باى لوح شمسي بتحدد لنا اذا كان اللوح ده كويس ومناسب للمكان اللى هنركب فيه ولا لاء
هنكلم عن الحاجات دى فى المقال القادم وكمان هنقول افضل المصانع المنتجة للالواح الشمسية ع مستوى العالم

اضف تعليقا