هنتكلم النهارده عن مكون جديد بيقترن وجوده فى المنظومة بوجود البطاريات بمعنى ان طول ما المنظومة بتاعتنا فيها بطاريات لازم بتلاقي المكون ده موجود
لحظة كدا بس من فضلك
ايه ده هى المنظومة ممكن اصلا ميبقاش فيها بطاريات 🤔
- اه يا فندم ممكن طبعا
- طيب وكدا هنشغل الاحمال ازاى بليل 😱
- ماتقلقش هنوضح لك النقطه دى كمان كام مقال كدا بس انت تابعنا باستمرار وخلينا نرجع للمكون بتاعنا 😉
المكون بتاعنا اسمه منظم الشحن solar charge controller
وده وظيفته زى ما هو باين من الاسم بتاعه ليه علاقه بالشحن وبيقوم بوظيفتين:
1-بينظم شحن البطاريات الموجودة فى المنظومة
2- بيحافظ عليها من الشحن الزائد ومن التفريغ الزائد
وبكده بيساعد فى زياده عمرها الافتراضي ..

يعنى منظم الشحن لا يمكن الاستغناء عنه لان عدم وجوده هيسبب مشكله على البطاريه لو اتوصلت مباشر على الخليه عشان كدا طريقه توصيله بيكون بين الخليه و البطاريه ...
*منظم الشحن منه نوعين:
1- نوع اسمه pwm (pulse width modulation)
2- نوع اسمه mppt ( maximum power point tracking)
والفرق بين النوعين دول بيكمن فى الطريقه اللى بيشتغلوا بيها وكمان فى نسبه الكفاءه اللى بتزيد على المنظومة
يعنى النوع ال mppt ده فى حاله وجوده كفاءه المنظومة بتزيد لانه بيساعد ع ان عدد ساعات الشحن بتزيد بسبب الطريقة اللى بيشتغل بيها
الكلام عن الانواع دى بيكون اكاديمى وبيحتاج شرح طويل بمعادلات وكدا ف ممكن يتم توضيحه اكتر فى ورش عمل هنجهزها لكم باذن الله
المهم انك لو هتدخل المجال لازم تبقا عارف النوعين دول ولو بشكل مبدئي وعارف ان طالما النوع التانى مميز كدا فهو هيكون اغلى فى السعر عن النوع الاول

طيب ازاى بنختار منظم الشحن؟
اولا : على اساس النوع بتاعه زى ما وضحنا فوق
ثانيا : على اساس مواصفاته الكهربيه اللى هى
- الامبير بتاعه بما انه بينظم شحن فيبقا اختياره ع اساس الامبير حاجه مهمه
- وبتختاره على اساس الجهد بتاعه لان كهربيا لازم الجهود للمنظومة تتساوى ....