الاون جريد سيستم

اتكلمنا المقال اللى فات عن اول نوع من انواع منظومات الطاقه الشمسية وهو النوع العير متصل بالشبكه ( اوف جريد سيستم)
عرفنا بيتكون من ايه وامتى نستخدمه
هنكلم النهارده عن النوع التاني من المنظومات وهو الاون جريد سيستم او النوع المتصل بشكبه الكهرباء
النوع ده بنقصد بيه عمل محطه طاقه شمسية وبنقوم بتوصيلها او ربطها على شبكه كهرباء الحكومة بهدف تصدير الفائض لشبكه الحكومة او بهدف تقليل الاستهلاك
طيب امتى نقدر نقول ان العميل بتاعنا محتاج محطه اون جريد
اولا لازم يكون متوافر عنده شبكه كهرباء
فى حاله ان العميل بتاعنا استهلاكه من الكهرباء عالي جدا والمساحه عنده مش كافيه ف وقتها بنعرض عليه نعمله محطه اون جريد توفر جزء من استهلاكه
او لو هو بيدفع فاتورة كبيرة كل شهر بسبب انه من ضمن شريحه عاليه فى المحاسبه مع شركة الكهرباء فبنعمله محطه تخليه يقلل الاستهلاك فينتقل لشريحه اقل
ممكن نعملها وقت ما يكون العميل استهلاكه بالنهار بس وعايز مش يركب بطاريات فى الحاله دى بردوا بتعرض عليه يعمل محطه بكامل استهلاكه ويربطها ع الشبكه هتوفر معاه فى السعر
طيب ايه هى مكونات منظومات الاون جريد؟
بتتكون طبعا اساسي من الالواح وبيكون قدرة الالواح اللى بنركبها بنفس قدرة الاحمال اللي هنشغلها او قدرة المحطه اللي العميل بيطلبها بس طبيعى لازم ندخل فيها حساب المفاقيد اللى بتحصل للسيستم نتيجه اختلاف درجه الحراره ونتيجه الفقد ف الاسلاك والفقد نتيجه كفاءه المكونات
المكون التانى هو محول الجهد (الانفرتر ) وهو هنا بيختلف تمام عن محول الجهد فى منظومات الاوف جريد من حيث جهد الدخل والخرح بتاعه
ف الانفرتر هنا بيكون دخله بيصل الى من 800 ل 1000 فولت
وخرجه بيكون نفس جهد الشبكه اللي هيتم ربطه عليها وطبعا بيراعى انه يعمل تزامن بينه وبين الشبكه
الانفرتر الاون جريد كمان بيتصف انه بيكون من النوع ال MPPT عشان يقدر فى اى وقت واى ظروف مناخيه انه يوصل للشبكه اقصى قدرة للالواح
كمان بيكون فى عداد ذو اتجاهين بيحسب كميه الطاقه المسحوبة من الشبكه والمولده ومرسله للشبكه من الالواح بيحيث يعمل مقارنه للسحب والتوليد ويحسب للعميل هل ليه فائض او ان الاستهلاك كان اعلى من التوليد
طبعا فى شويه اجراءات بتم عشان العميل يقدر يربط محطه على الشبكه
دى هنكلم عنها المقال الجاى بإذن الله استنونا الجمعه الجايه

اضف تعليقا